Puisi (Geguritan) Balada Bahasa Jawa

BALADA ANAK LANANG

(marang Suripan Sadi Hutomo)

Iki critane si anak lanang

sing duwe gegayuhan ngregem kerlipe konang

sarana getih putih dheweke ngilangi pupuk lempuyang

Bapa! Bapa! Aja tegakna anakmu mlaku

jer nyatane lagi ajar nyekel garu lan luku

durung pana endi kerlipe lintang

gampang kapilut gumandhang swarane kompyang

Bapa! Bapa! Anakmu lumaku

lagi bisa kudhungan tumbu

lagi bisa sruwalan kacu

aja tegakna aja jorogna

anakmu sing klebu kedhunge samodra

Piwelingmu piweling bapa

piwulangmu piwulang brahmana

Panggah daklacak satriya kang angejawa

sing tetembangan Kinanthi lan Dhandhanggula

        Kalamunta wus winengku

        kadya sumpahing prajurit

        nguri-nguri kabudayan

        weh kuncara sastra jawi

        aywa lena ing paningal

        aja kendhang jroning warih

        Jejering panggurit tama iku

        santosa lir kridhane turangga

        pindha arga upamane

        jroning ngrungkebi wahyu

        winahya mring dhiri pribadi

        tetapa lara lapa

        sumpah trus winengku

        datan melik bandha donya

        ngugemi jejering gunawan utami

        labuh mring kabudayan

Iki critane si anak lanang

sing kasasar ing dalan cawang

mbuwang kembang banjur milih bathang

awit kapilut pocape kadang

Jare ana gumuk emas

anak lanang nglalekke wekas

Gojag-gojeg batine si anak lanang

gojag-gojeg si tukang kendhang

gojag-gojeg sedyane si tukang satang

Bapa! Bapa! Anak lanang kabotan pikir

kadereng rambatane guritan saya kapuntir

jare Jawa jumawa tanpa waja

dene jiwa jinawi tanpa yuwana

Eman-eman wong Jawa kaya kedanan

lunga sawah nganggo sepatu suthik tudhungan

eman-eman wong manca saya kepranan

kabudayan sing wis suwe dadi sirikan

Iki tekade si anak lanang

maju perang tanpa rowang

sangu tumbak paringane sang maha guru

japa mantra aji sekti trus lumintu

        “Anak lanang! Anak lanang!

        langit mlerah mbranang abang

        aja disengguh cabe lempuyang

        Anak lanang! Anak lanang!

        njomplang singgasana sang Giri Nata

        yagene sliramu malah dolanan dahana?

        Anak lanang! Anak lanang!

        endi sedyamu ngruwat si prawan Wuri

        Mahesasuramardini wanita patrap kemaki?”

Bapa! Bapa! Adhuh lungkrah iki kunarpa

adoh daksasak wana wasa

Endi dununge Angin Sumilir

Sedya dakiling isining takir!

Ambal Kebumen, Januari 1997

(Panjebar Semangat. No. 25-Tgl. 21 Juni 1997)