DURYUDANA GUGUR
DISC 1
JEJER PAKUWON SEWUNTANA
Menika purwakaning bandha hamboja marwatasi mring sang hyang
para pamriksa. Ngaturaken carita dek jaman purwa puniki tan nyedhehan wulan
wuruk mung sumandha paring priksa den nira medhit palupi. He... Wasana mugi
rahayu. Mugi rahayu kang samiya tinandya. Palungguhna dwining letas lukita
linoden kidung kadung kader hamomong. Memangun manah rahayu hanjwana tan
manggulung cumolong manastungkara. He... Tarungan karana pangatus puspitawan
salap samrawut. Hong... Hong wilaheng. Hong wilaheng hawitnan hastu memasidan
mastusilat mring nggon jagad sarola, siran tandha wiseksaning busana sana
sinawung lan mula pangestuning sih listantun lan panjutur sinatur katur katuluk
tetela mrih tulat ladin paradya. Winursita upama pramenwistara karan kodyan
rumiyin jaman purwa. winisugra trah kang ginama gama winardikan lelaka madya
cekap wasananing gupita tanduking pralamban matumpa-tumpa marma pandhung, pandheng,
panggungngup sang hyang nata. He...
Hanenggih pandita kang kinarya bebuka murcita ing utawi samangke
ingkang kaheka adi dasa purwa. Eka sawiji, adi linuwih, dasa sapuluh, purwa
wiwitan. Sanadyan gumelaring jagad kathah titahing jawata ingkang sinangga
pratiwi kasung, sung alingan akasa kinapit samodra kathah kang sami anggono
raras. Nanging lamun ta kaupaya sewu datan saged mujudaken sadasa, satus datan
jangkep tiga. Pranyata kang kinarya bebukaning carita rikalinggan menika menggih
pakuwon bulupitu, ya kasebat pakuwon sewuntana.
Sanadyan ta gumelaring pakuwon wonten madyaning wana, nanging
tan para beda kadhaton nggenggen. Awit nalika samanten ing tananggelar pakuwon
munggwing telenging wana Bulupitu narendra binathara ingkang angrenggani turaya
nagari Ngastina ingkang ajejuluk Prabu Duryudana, ya Prabu Jaka Pitana, ya Kurupati
Gendarisuta, ya sang Dastratmaja, ya Tripanansah. Nalika samanten gumelaring
jagad bebasan peteng ndhedhet linungan yayah bangun kasampun lebu maruta dhatan
lumampah, ron-ronan dhatan nimbah amung sakedhat-sakedhat kapireng suwanten
jumeglug sangking telenging samodralaya. Sayekti iki swaraning alun bantheng
gumelaring bawana makaten awit kena prabawaning prangageng Baratayudha
Jayabinangun ingkang sampun tumindak wolulas dinten rikalenggan menika.
Lumampahing perang Baratayudha Jayabinangun ingkang sampun tumindak wolulas
dinten rikalenggan punika ora mokal gedhe prabawane. Sinebat perang Baratayudha
awit peranging dharah Barata, inggih punika Kurawa myang Pandhawa sami-sami
dharah Barata, ingkang sami nggegeti leresipun piyambak. wonten bebasan cukeng klayan
akri, dumadosing pasulayan ngantos dumadi dledhak perang Baratayudha
Jayabinangun. Sanadyan ta sampun kathah ingkang dados bebanten wonten madyaning
paprangan Tegal Kuru, namung kala samanten Prabu Duryudana yayah tugu raja
panggalihna. Wantot ing penggalih dhatan kepareng minangkani panuwuning
Pandhawa, ingkang sanyatanipun punika kwajibaning Pandhawa. Nalika samanten
Prabu Duryudana lenggah wonten madyaning pakuwon, ngregemeng ingkang munggwing
kanan kiring amung abdi emban ingkang kepareng ndherek wonten madyaning
pakuwon. Kinen munggwing ngarsa tumungkul yayah konjem pertiwi, wedanane
pisowanane naredra mantrinoka hiya Patih Harya Sengkuni, ya raden Tri
Gantalpati, ya Harya Soma, ingkang lenggah klasa jenar. Ha....
Aja dumeh Patih Sengkuni wis kaduk yukswa, bebasan wis gempong
pil kutu ampas jandil wanik, nanging kalukeng rat kacuriganing manah miwah
dungkas kawruh salwiring elek datan mokal pinercaya ngasta abaning negari
Ngastina, dhasar taksih kaleres bapa pamanira sang nata. Patih Harya Sengkuni
mengkeraken pisowanipun kadang taruna nata Ngastina, satriya ingkang lenggah
kasatriyan tirta kinalan. Kekasih raden Kartamarma ingkang pinarcaya minangka
kahartadan negari Ngastina. Raden Kartamarma mengkeraken sowan para kadang
santana ingkang taksih gesang kasambet pisowanipun para wadya. Nadyan wus datan
sepintena kathahing para wadya turta sampun sami nandang tatu ora mokal
ketingal pating tleset. Namung ingkang dereng nandang cintraka tansah ngencengi
kendhoning gendewa. Anyudan gada miwah anglimis-limis gegaman kaya-kaya sedya
nyirnakaken mengsahnya. Rikala samanten tan ana kang obah. Candrane yayah sang
hyang candra katalengan hawa penggalihan nira sang nata. Leng-leng ngendriya
manawung linanggung sang hyang wisesa kawekas kawespadaning cipta wilabeting
bangsa titah dipuntanda pamayanging jawata sumlingut kabiyatan rucik dadiya
muhung marang tumindak ing sunggulanggang toya. Ingkang amurwani tumembenging
suntawa sang nata menggalih, donya katumben kicalan bagedhut negari Ngastina.
Mata landha Prabu Karna Basusena ingkang kapendhet kakukuh wonten
madyaning Suramadyalaga. Eling-eling Prabu Duryudana, narendra gung binathara
sanadyan tumendem sungkawa sinawung-sinawunggana ngantos dhatan kang wistara.
Salebetna wonten datan kang obah horek ingkang sowan wonten sakjawining pratila
ingkang hangurwani horek sawengkara wadya awit rawuhnya Narendra Mandaraka ya
ora tumadras Prabu Salya, ya Narasuma, ya Prabu Mandradigda tedhak saking
titianira sigra kapapat para kadang sentana den acara linenggah. Kalenggahanira
kapareng caket kalenggahan dalem sang nata Duryudana. Dugi Prabu Salya wus
mapan lenggah katingal mencorong cahya tejane, sirna sipating bathara, inggih
Bathara Indra dewaning budaya mangejawantah. He.. Dene sang rawuh Prabu Salya
bebasan ngrembug ngajeng sangga prawadya. Kacarita Prabu Duryudana dugi ngulat
ngrawuhaken Prabu Salya ya Prabu Mandradigda kepareng ngacarani wonten rama sawesatis.
Hanungkulaken jangga, mujudaken asta, kapareng rukming doya mangkana cipta
wringganira kang dereng kawijil. O...
o... o... he...
Kerlap-kerlap sami tumonton rengganing pragata. O... Para
dewa-dewi myang para resi. O... Para dewa-dewi myang para resi kadyas mawas ing
dalu. Murbeng laku bangsa rarung. Fajar aruming katingal. O... Reng-renging
driya manawung rinawung Sang Hyang Wisesa. He... Leng-leng ramyaning bangsa
sangka wayah murbeng lagya somar. O... Maring garuning puri. Redyangitna
sirmandaya, mandaya sekaring bawana. Ong.. Jaladri kang kapitaning surya,
deneng diwangkara anjrah sumembur saking jariya risang sekaring narendra. Ho...
Sukmeng nala sedya asmara, dewa dewataning sukmengnala. Sarira kang
madibya-dibya. Hamuja harja harjaning bawana. O... Leng-leng dadiningkan awan
saba-saba ning keng Ngastina samantara tekeng tegal kuru nararya ya Kresna
langguh. Sireng prasurama, myang kang wa Janaka, dulur narada katandya tegal
wiluri milu karya. O... Sang nohupati, sang nohupati.
Pasewakan ing Pakuwon Sewuntana.
1. Duryudana : “Jagad
wasesaning bathara, estungkara manik raja dewaku. Paman
Harya Sengkuni!”
2. Sengkuni : “Kawula
nuwun wonten dhawuh ingkang ngendika, sinuwun.”
3. Duryudana : “Bilih mboten
sisip pandulu putra pekenira ingkang katemben rawuh
Rama Prabu Mandaraka.”
4. Sengkuni : “Kawula
noknon, kepasang yogya pangandika dalem ingkang sinuwun mawantu-wantu panuwun
kula sinuwun. Kepareng lajeng ngacarani rawuhipun sinuwun, panjenenganipun Kaka
Prabu Mandaraka.”
5. Duryudana : “Paman Harya
Sengkuni! Rama Prabu, Rama Prabu Salya! Dereng dangu rawuh wonten madyaning
pakuwon Sewuntana, putra jengandika nyaosaken pambagya palakrami saha
pangabekti kula konjuka sahandhaping pepada mawantu-wantu.”
6. Prabu Salya : “E...e...
jagad Dewa Bathara. Dahat kadya kalinggamurda dugi nampi sabdanipun angger
Prabu Duryudana ruwentah ingkang Bapa Mandaraka. Pangandikanipun anggen Prabu
Duryudana kula tampi asta kalih kula pethelaken njaja nambahana daya kasantosan
kula. Anggen prabu mundhut pirsa, sowanipun ingkang bapa wonten madyaning
pakuwon sewuntana. Awit pamujinipun angger Prabu kasengguh pangayomaning hyang
widiwasa. Sowan kula wonten Pakuwon Sewuntana winantu ing karahargayan mboten
pinanggih sambekala, ngger. Puja pangestamanipun ingkang bapa sayogya katur
ngarsaning angger Prabu Duryudana.”
7. Duryudana : “Ora walat
panampi kula. Sabdanipun bapa prabu menapa rama prabu kula pundhi mestapa mugi
dadosa jejimat. Keparenga dipunprayogakaken lenggah.”
8. Prabu Salya : “E.... inggih.”
9. Duryudana : “Paman, sampun
ngantos kadaluwarsa nyaosna pambagya ngersanipun rama Prabu Mandradiba.”
10. Sengkuni : “Kawula
noknon inggih dalem sendika. Kaka Prabu Salya ingkang rayi Prasa Jenar
linepatna saking bebendhu, keparenga nyaosaken pambagya basuki rawuh wonten
madyaning pakuwon Sewuntana.”
11. Prabu Salya : “Iya iya.
Manguji nguwadi kepatihan ora ana ing sambekala.”
12. Duryudana : “Rama Prabu
Mandaraka?”
13. Prabu Salya : “Inggih kula,
ngger.”
14. Duryudana : “Sasampunipun
lenggah kanthi Prayogi, sanadyan kula sampun mangertos bilih kaka prabu Karna
kasangguping rana sejatos kejut raosing manah kula. Upaminipun tiyang
cangkriman, kaka Prabu Karna tandhing klayan Janaka, kula batak kedah sasak,
kaka adipati. Nanging sebab menapa katemahan kaka Prabu Karna ingkang kasangguh
ing rananggana. Kula pengin mangertos kados pundi dedongenganipun? Dawanipun
rama prabu ingkang ngasta kendali kendhalining kuda pangiriting rata
titiyanipun kaka adipati, tamtunipun priksa sasolah bawanipun kaka adipati.”
Leng-leng ramyaning kang driya, e.. .katambanan katantreman
sumuking tyas kang daduridan. Oooong kadadyan wujid. O....
15. Prabu Salya : “E...e...
pancenipun awrat anggen kula badhe matur, jalaran kados mboten wonten
paedahipun. Nanging bawaning prabu kepengin priksa kawontenanipun kang raka
mwangga majeng raranggana, inggih sedya kula aturaken menapa kawontenanipun.”
16. Duryudana : “Inggih.”
17. Prabu Salya : “Sasampunipun
kang raka Awongga kanthi layan Arjuna tangkep jaja kang taran bahu genti milah
tatu. Rame anggenipun pacakoro dedel pinedel, diya diniya, satemah anggenipun
ngasta curiga ligan lajeng sesarengan kendel sami mundur saking pabaratan
lajeng nitih rata. Karna nitih rata Jatisura, kula pinangka kusiripun, Arjuna
nitih rata Jaladara kang raka Dwarawati kusiripun.”
18. Duryudana : “Inggih.”
19. Prabu Salya : “Salaminipun
Karna menika dados anak kula mantu, sayekti kula mangertos watak wantunipun
raka Awongga jebul watak satriya estu.”
20. Sengkuni : “Sebabipun
kados pundi kaka prabu?”
21. Prabu Salya : “Aku iki kudu
mangsuli kowe apa kanjeng prabu?”
22. Sengkuni : “Kula ajeng
caos kanjeng atur prabu Duryudana, kula namung badhe kepingin ndherek
mirengaken.”
23. Prabu Salya : “Dugi rata
punika sampun ngancik wonten madyaning blambang manunggal. Mboten wonten babar
pisan mboten wonten ingkang mijil saking mendho kendanu naga sabongkoting
ngetal.”
24. Duryudana : “Naga
sabongkoting ngetal?”
25. Prabu Salya : “Inggih. Naga
wau saged tata jalma. Kula mirengi anggenipun rembagan. Naga wau ngagem harda
walika. Mrepeki kang raka, kepengin badhe nandhingi pun Arjuna. Mangkin yen
Janaka pejah, kamenanganipun dipuncaosaken kang raka Awongga. Sanesipun kang
raka Awongga lak kedah lira, nanging yen raka Awongga malah ndadosaken
muntaping manah dados duka. Jalaran Karna saged milah-milahaken iki butuhing
pribadi iki butuhing kulawarga. Yen Janaka punika dipunpejahi harda walika
mboten lila awit enget yen Janaka niku kadange taruna. Nanging kok Karna purun
nandingi kudangipun Janaka amargi netepi kuwajibaning satriya anggenipun sagah
netepi dados senopatinipun Kurawa. Lho, rak awis to, ngger? Perang ageng punika
saged makaten manahku, bisa mbedakake iki butuhing kulawarga, iki butuhing
kuwajiban.”
26. Duryudana : “Inggih.”
27. Prabu Salya : “Wasana naga
dipuntundhung sarana rembag mboten purun, dipunsorok mawi keris nanging saged
mluncat. Lajeng nyumanggakaken naga menika wau dhateng pundi kula mboten
ngertos.”
28. Duryudana : “Inggih.”
29. Prabu Salya : “Sareng
lancaran jemparing Janaka klayan kang raka Awongga. Waaah perang baratayudha
tumindak wolulas dinten, mboten wonten ingkang kados tandhingipun Karna lan
Janaka, rame, edi.”
30. Duryudana : “Rame nanging
sae?”
31. Prabu Salya : “Sae. Sae
nalika Karna tandhing. Dhalangipun enem, mila sae sanget. Ngger banthara kados
mendhung ngendanu, punika wujudipun jemparing, jemparingipun Karna klayan
Janaka. Mangka pun priksani dewa telung puluh watak sanga widadari kethi kurang
sawiji. Rak katingal dhirgantara pating glebyar. Namung ndadosaken kawuningan,
ngger. Dupi kang raka Awongga den lepasi pusaka dening Arjuna ingkang nama Kyai
Pasopati. Tumanem jangganipun kang raka Awangga sanalika seda sumendhe rata
kwandhanipun.”
Leng-lenging driya mangu-mangu mangungkung, mangu-mangu
mangungkung wan wan winangun kang lagya hamangi. O....O.... dan kena niya ing
nala. O...seket byar dupi Prabu Duryudana midhanget pangandikanira sang rama
Prabu Salya, sanalika muntak dukane tumenga tebak jaja tumungkul tampel wentis.
Gegrontolan mijiling riwik sajagung-jagung mijil sasela-selaning jaja. Dereng
ngantos ngandika horeg sowaning para wadya katungkul pisowanipun Bambang
Aswatama. (sindhenan).
32. Duryudana : “Waaah
Aswatama gawe kaget. Kawula noknon nuwun sewu nyadhong duka sinuwun.”
33. Sengkuni : “Ana apa
Aswatama, tanpa paliwara? Bebasan kumrojog tanpa larapan.”
34. Aswatama : “Inggih paman
kepatihan. Awit wonten wigatos ingkang kedah kula unjukaken ngarsa dalem
ingkang sinuwun.”
35. Duryudana : “Padha kanthi
becik sowanmu.”
36. Aswatama : “Inggih
pangestu dalem ing sinuwun. Boten manggih sambekala sowan kula, sungkeming
pangabekti konjuka sahandhaping pepada mawantu-wantu.”
37. Duryudana : “Iya tak
trima. Ana wigati apa sowan ing ngarsaku ora daktimabali?”
38. Aswatama : “Kepareng
ngonjukaken atur sedaya lepat nyuwun gunging pangaksama.”
39. Duryudana : “Iya.”
40. Aswatama : “Ingkang badhe
kula aturaken ngarsa dalem ingkang sinuwun, lelampahan majengipun kaka Adipati
Karna dinten wingi wonten madyaning Suramadyaloga.”
41. Duryudana : “Iya.”
42. Aswatama : “Walih-walih
menapa wiwit bidhal saking Pakuwon Sewuntana prasasat kula mboten pisah kliyan
Krata titiyanipun Kaka Adipati Karna. Kula wonten pengkeraning krata.”
43. Duryudana : “Aswatama ana
mburining krata iki titiyane kaka Prabu Awongga.”
44. Aswatama : “Inggih prabu,
inggih. Mila sasolah bawanipun kaka Prabu Awongga kula tansah ngulat.”
45. Duryudana : “Iya.”
46. Aswatama : “Wadhuh
ndadosaken kawuningan. Umpaminipun tiyang lumampah, yen kaka adipati punika
mboten wonten ingkang njagal, kedah kaka adipati unggul jayanipun. Janaka kedah
pejah saka astanipun kaka Adipati Awongga.”
47. Duryudana : “Kowe aja
waton matur. Kowe bisa matur umpamane wong mlaku kaka Adipati Karna ana ingkang
njagal iku kepriye lelakone.”
48. Aswatama : “Kula mboten
matur ndara menapa wonten ingkang kula aturaken. Saweg ta adipati ngasta pusaka
menthang gendewa Kyai Wijayandanu sinandhangan larastra Kyai Wijayacapa. Anggen
kula maspadakaken bebasan kedhep tesmak. Ingkang kedah dateng klesah tumaneming
jemparing kedah jangganipun Janaka. Namung ndadosaken kawuningan kaka prabu.
Sesarengan lumepasing jemparing, kendhalining kuda pangiriting rata
dipunsendhal kaliyan risang kusir. Krata sisih wingking dipungenjot. Mboten ana
mokal, kuda kaget satemah nebak-nebak lampahipun. Lumepasing jemparing olih,
nanging banter kebat pindho kilat kesit kadi sakit, namung lampahipun mboten
leres. Satemah namung saged nyaut lungsenipun Janaka. Dados menawi mboten
wonten reka dayanipun nuwun sewu, sinuwun Mandaraka panginten kula kedah Kaka
Adipati Karna ingkang unggul jayanipun.”
Jaja muntap pindho kinedat, netra kocak ngondar-andir idep
mangala cakra. Ong.... gumedut padoning lathi terota nang pojok, sumung-sumung
jajanira netra ndek sarira tunggal. Haar....
49.
Prabu Salya : “Nuwun sewu, ngger Prabu Duryudana. Kepareng
mboten kepareng wanci kula suwun.”
50.
Duryudana : “Badhe kagem menapa?.”
51.
Prabu Salya : “Badhe kula angge mangsuli tiyang ingkang
dahat nyerwetek pamanggihipun.”
52.
Duryudana : “Sampun ngantos duka rama.”
53.
Prabu Salya : “Mboten, mboten. mboten napa-napa. Awit kula
mireng aturipun Aswatama menika menawi namung kula ampet wonten batos, kula
pendhem wonten raos, yen getih kula punika menggah mlempat dumugi sirah, kula
saged pejah dadakan. Mila leganing manah kula kedah badhe kula wangsuli. Mboten
napa-napa kok, ngger.”
54.
Sengkuni : “Eeeleh.”
55.
Prabu Salya : “Ora usah yang yung, Sengkuni!.”
56.
Sengkuni : “Inggih.”
57.
Prabu Salya : “Aswatama? He! Aswatama!.”
58.
Aswatama : “Kula.”
59.
Prabu Salya : “Kowe matur ing ngarsane Prabu Duryudana
akeh-akeh titi mau. Kowe nggunakke pikiranmu ingkang wening, apa mung waton
kowe matur? Apa kowe iku mung waton ngucap, apa nggonmu ngucap nganggo wewaton?.”
60.
Duryudana : “Sampun, rama!.”
61.
Prabu Salya : “Sekedhap, mboten napa-napa, ngger.”
62.
Prabu Salya : “Aswatama! Cekak gampange kowe duwe pandakwa
marang aku, nek Karna kuwi mungsuh Janaka, nggone kalah aku ingkang ngalahke,
aku ingkang dadi dalane, ngono? Ngono jajal aku tak takon. Karna kuwi apaku,
Janaka kuwi apaku? Angger Prabu Duryudana iku apaku? Nek kupingmu kuwi budheg,
mripatmu kudu bisa nyawang. Nek mripatmu kuwi blawur ora bisa nyawang kupingmu
kudu krungu, Aswatama. Mokal nek ora ngerti. Nek Janaka kuwi mung plunan wae,
merga adhiku iku dadi ibune kuwalon si Janaka. Ning nek Karna, rak cetha kuwi
mantuku. Mangka ing madyane perang
baratayudha iki Prabu Duryudana iki ya mantuku. Apa klakon aku maratuwaning
kloro iki anak mantu? Aswatama! Kowe duwe panemu kaya mengkono kuwi kowe arep
golek kamukten, ning ngancik-ancik sirahe wong liya tak kandhani. Ora maido nek
bapakmu kui sugih ngelmu, ora mokal wenang dadi gurune dharah kurawa. Nanging
kowe mung mamerke dumeh anake wong ketrima. Anake wong ketrima kui nek ora
prihatin dhewe ora bakal bisa ngundhuh kapinterane wong tuwa lan kabegjane wong
tuwa. Kono wangsulana! Nek pancen kowe paring atur palaradan, dhek bapakmu mati
kowe iku njut madeg madyaning praladan mung ngeluske dhadhamu, ngatonke
kekendelanmu, apa sebabe nalika bapakmu mati kowe minggat? Malah nek ora kleru
matine bapakmu kuwi merga rumangsa nek kelangan kowe dianggep kowe wis mati tak
kandhani. Bareng bapakmu tekaning pati, kowe arep kepengin ngatonake lelabuhanmu,
ning ndadak arep ngancik-ancik sirahe wong liya, iya? Kowe kuwi manungsa ning
anake wong sing doyan suket tak kandhani. Ora jeneng mokal kowe guneman waton
bisa muwus. Saiki tak walik takone ora susah, kok kowe ndadak ngakeh-akeh
tembungmu. Aswatama wae. Wani tandhing karo Salya? Nadyan ta Salya wis ngadek
ora jejeg nek ora dicagak nganggo teken. Nanging tanganku kiwa nyampluk
seiringanmu ora pecah sigar mratak sirahmu tak sembah ider-ideran Aswatama!.”
Aswatama lunga jengkar mlayu.
Gendhing ...
63.
Prabu Salya : “Sampun dipunalang-alangi, ngger! Pancenipun
badhe kula jangkah Aswatama. Najan sampun pikun, ning dereng rumaos blereng
ningali wujudipun Aswatama.”
64.
Duryudana : “Wadhuh rama, nyuwun pangaksama kepareng ngracut dujanipun
kanjeng rama.”
65.
Sengkuni : “Wadhuh kaka prabu. Bilih kaka prabu kalampah mbujung
Aswatama, upaminipun ngantos pasulayan bandayuda, menawi menang mboten badhe
kondhang. Nanging nyuwun sewu yen ngantos keseser marak barang wirang.”
66.
Prabu Salya : “Dadi kowe mestheke yen aku kalah, ngono.”
67.
Sengkuni : “Kula boten nemtokaken yen kawon, nanging yen kaka prabu
menang rak ora kondhang, mung mungsuh Aswatama. Keparenga ngracut dukaning
penggalih kasilama mawi tirtaning kesabaran makaten.”
68.
Duryudana : “Inggih rama prabu. Keparenga ngracut bermantiyanipun rama prabu.
Menawi rama prabu mboten saged ngracut ubaling duka rama prabu, lajeng dados
menapa menika mangke?”
69.
Prabu Salya : “Kula nyuwun priksa angger prabu, kula
sejatosipun baratayuda menika tumut inggih saged, inggih mboten tumut inggih
mboten napa-napa. Nanging rehne kula enget yen kula menika bapa mara sepuh
wasana lajeng wonten kadadosan kados makaten. Kula nyuwun priksa angger prabu,
pitados menapa mboten kaliyan aturipun Aswatama?”
70.
Sengkuni : “Pitados Aswatama ajeng ngge napa? Sinuwun kula ajeng matur
yen mboten ngaten niku.”
71.
Duryudana : “Kula mboten pitados aturipun Aswatama. Kula pitados rama prabu.
Rama prabu mboten kalampah ngloropaken Adipati Karna.”
72.
Prabu Salya : “Estu, ngger?”
73.
Duryudana : “Kula noknon, inggih.”
74.
Prabu Salya : “Menawi makaten, ngger, kula gadhah panuwun.
Aswatama wiwit dinten menika kedah minggat saking tlatah negara Ngastina.
Mboten kenging ngambah tlatah Ngastina. Sinten ingkang ngayomi Aswatama, kedah
dipunpidana mawi wasesaning nagari Ngastina, dipunkatutaken dosa lepatipun Aswatama, tepakipun Aswatama kedah
dipuncukil, dipuncuri bubur kapurenta.”
75.
Duryudana : “Nggih. Paman Arya?”
76.
Sengkuni : “Kawula noknon.”
77.
Duryudana : “Mangkin kadhawuhna para kadang, wiwit dinten menika Aswatama
mboten kenging ngambah tlatah Ngastina. Sinten keng ngayomi Aswatama, kula
katutaken lepatipun Aswatama, badhe nampi pidana.”
78.
Sengkuni : “Kawula noknon inggih dalem dhawuh sendika.”
79.
Prabu Salya : “Lega raosing manah kula, ngger. Rehne angger
prabu sampun minangkani panuwun kula. Kula kadakwa dening Aswatama ngloropaken
Karna, mila kalenggahan menika senopati keparenga kula suwun, kula keng sagah
ndhepani paprangan Tegal Kuru.”
Leng-lenging driya mangu-mangu mangungkung, gandhwan rimang yayah rina
tan kanin. O... lamun tan dulu sumengku ndyah utama. Sang nata mudha, sang nata
mudha wuwuse angrepa. O... O...
80.
Duryudana : “Matur sembah nuwun rama prabu. Rama prabu kepareng badhe paring
pangayoman dhumateng ingkang putra Ngastina. Keparenga lajeng nyuwun priksa
mbenjang menapa jumangkah wonten madyaning paprangan?”
81.
Prabu Salya : “Kedangon menapa ingkang kedah kula entosi.
Sanajan ta cara lintang sambet obor sedya bidhal kalenggahan menika nanging
kula kapeksa, ngger, nyuwun pamit wangsul dhateng Mandaraka. Awon sae leres
lepat kula kedah pamit kaliyan keng ibu, kanjeng Ratu Setyawati. Mangke saking
Mandaraka kula mboten prelu sowan dhateng Sewuntana, kula lajeng njujug wonten
pesanggrahan Ngrunting tepining paprangan Tegal Kuru, dek ing wingi
pesanggrahanipun keng raka Ngawongga.”
82.
Duryudana : “Nun inggih ndherekaken kaluhuran.”
83.
Prabu Salya : “Sengkuni!”
84.
Sengkuni : “Kawula noknon.”
85.
Prabu Salya : “Mangsa bodhoa nggonmu mbeborehi atur ana
ngersane angger prabu supaya bombong penggalihe.”
86.
Sengkuni : “Kawula noknon, inggih.”
(Prabu Salya kondur menyang
Mandaraka).
prabu Duryudana, mespadakaken
Prabu Salya mijil saking pakuwon, bebasan kedhep tes mak, denya mandeng
mindeng-mindeng ngantos satelasing pandulu. Prabu Duryudana, dereng mu nandika
awit salebeting penggalih nemtokaken menawi Prabu Salya saged unggul jayane,
nanging kosok wangsul kaliyan pamanggihipun Patih Sengkuni, dupi Prabu Salya
majeng madyaning paprangan malah kawengku raos kuwatos. Mila kekalihnya Prabu
Duryudana Patih Sengkuni bebasan ning kaya banyu ning kaya watu, salebetnya
datan wonten ingkang mobah mosik, hor sowaning para wadya kang munggwing
padelaradawu. Ingkang amurwani hor sowaning para wadya, sowanipun narendra
gagah bideksa, galeyah-galeyah lampahe.
Tyo lumarap caraka kang nembe krato. O... tinata trapsilanira. Galontenge
ratata lenggah munggwing ngarsaning narendra. O... tumanduking narendra. O...
tan ana kuciwa raras. O...
87. Duryudana : “Paman Arya!”
88. Sengkuni : “Kawula
noknon.”
89. Duryudana : “Ana narendra
gagah pideksa rawuh wonten pakuwon sewuntana.”
90. Sengkuni : “Kawula
noknon inggih sampun ngantos kadaluwarsa, kaparenga lajeng ngacarani.”
91. Duryudana : “Mengko, ta,
ki sana ingkang katemben wae rawuh aja dianggep aku tumangguh, sejatine wadya
iki aku gambuh. Nitik rengganing busana, busana narendra, lamun kepara nyata
narendra ngendi, sapa jejuluk ira?”
92. Suryabupala : “Estungkara
jagad maneka raja dewaku, ui,,,e. Boten lepat panjenengan dalem mastani yen
kula jejering narendra. Awonten kula niki narendra saking negari Girigupita.
Dene jejuluk kula ingkang mersud mestani jejuluk Prabu Suryabupala.”
93. Duryudana : “Prabu
Suryabupala?”
94. Suryabupala : “Kawula
noknon.”
95. Duryudana : “Raharja rawuh
ana Pakuwon Sewuntana.”
96. Suryabupala : “Inggih,
pangestu dalem boten manggih sambekala. Keparenga nyuwun priksa menapa
panjenengan dalem narendra Ngastina ingkang jejuluk Prabu Duryudana?”
DISC 2
(ing pasewaan ngastina)
97. Prabu Duryudana : “Prabu Suryabupala?”
98. Prabu Suryabupala : “Kawula luk nun.”
99. Prabu Duryudana : “Rahadja rawuh hurung pakuwon sewuntara.”
100.
Prabu Suryabupala :
“Pangestu dalem liirsambikala, keparenga nyuwun pirsa menapa panjenegan dalem , Narendha Ngastina ingkang jejuluk
Prabu Duryudana.”
101.
Prabu Duryudana : “Ora
bakal sisih panduganmu, sayogyaku ratu Ngastina Prabu Duryudana.”
102.
P.Suryabupala :
“Syukur begja sewu, yen mekaten kepareng ajeng kula anjuk atur sewu lepat
nyuwun gunging pangaksama.”
103.
Prabu duryudana : “Iyo.”
104.
P.Suryabupala :
“Sowan kula wonten ngarsa dalem. Diwaji Ngastina ingkang sepisan nyaosaken
pangabekti!”
105.
Prabu Duryudana : “Ndaktompo.”
106.
P.Suryabupala :
“Ingkang ndungkap tompo kalih. Kula ngaturaken, nalika semanten putra
siswanipun Rama pambadruna ingkang nama Prabu Suryandana menika adhi kula. Adhi
kula Suryandana, sampun kepungkuh ing ngayondra. Miturut pawarta ingkang kula
tampi hayang ngringi majengipun putra wirataseta utawa wilasangka!”
107.
Prabu Duryudana : “Iyo.”
108.
P.Suryabupala :
“Milajen ngersa dalem boten trimah pejahipun adhi kula Suryandana, bawanipun
ingkang mandegani dumadose perang Bratayudha nanggal koko Prabu Duryudana
keparenga kula badhe caos pambiyantu, keparenga koko prabu marengaken Pandhawa
kula ingkang suwun nyirnaaken, mboten trimah raos ing manah kula, Bratayudha
wolulas dinten kalenggan menika. Nami Werkudara, Janaka kontab ing jagad. Sedya
klenger, badmisuripun Werkudara lan Janaka, dereng lega ing raose mana kula
menawi dereng ngremet-ngremet tulandhanipun Werkudara tuwin Janaka.”
109.
P.Duryudana : “Kados
pundi Paman Sengkuni?”
110.
Sengkuni :
“Waduh...pemanggih kula menika dumawahe wahyu ning kemenangan. Nyuwun sewu
malih-malih menapa, nalika koko Prabu Salya sagah majeng madyaning paprangan
raose ing manah kula rak tuwuh, raos boten pikados awit nitik pangendikanipun
prabu Nandharaka wiwit dereng dados Perang Baratayudha menika rak kados
ngrengalangi dhumateng andhalem yen ngantos Perang Baratayudha dados, dados
kula kebak raos sujana. Nanging, sareng Suryabupala menika dadi caos
pambiyantu. Kula nemtokaen menika wahyuning kemenanganing Kurawa, boten perlu
kuwatosi Kurawa katah ingkang pejah nanging Pandhawa nggih katah ingkang ical saking Ngadyapadha. Cobi
pejahipun Gathotkaca, Antawijaya menika ndadosaken angles raose manah
Werkudara, Janaka mangka menika cara srawung lak waras dereng babak buncik
nadyan manjing wonten ing peperangan mesthi mlempem lho menika.”
111.
P.Duryudana : “Yen
mekaten dipun tampi dipun tampi, yayi Prabu?”
112.
P.Suryabupala :
“Hahoha, luk nun.”
113.
P.Duryudana :
“Daktompo, yayi prabu bakal sambiyantu nyirnake Pandhawa.”
114.
P.Suryabupala :
“Wah,wahahaha...matur sembah nuwun. Namung dadosna kauningan bapa prabu. Tiyang
perang menika ragadipun katah.menawi kula saged nyrinaaken pandhawa menapa
ingkang kedah pun parengaken kula. Pamundutmu apa, bilih kula kepareng ngunjuk
menawi kula kalampah ngingkes Pandhawa. Ngastina kaloko gadah gunung kencana,
gadah gunung haleyak menika keparenga kula ingkang murgawasesa, koko prabu
inggih kula caosi mangke. Nanging, mesthinipun kula ingkang wenang wranata.”
115.
P.Duryudana :
“Nggih.”
116.
P.Suryabupala :
“Lajeng sumber lisah pertara ingkang klebet tlatah negara Ngastina inggih kula
ingkang murgawasesa. Lajeng bandar-bandar ingkang kanggo mandek baita ageng
saking mancanagari kula ingkang nata. Koko prabu mangkih kula caosi sampun
kantun. Umpaminipun busana sampun kantun ngagemmekaten kemawon.”
117.
P.Duryudana : “Dos
pundi paman.”
118.
Sengkuni : “Wah niku
sing rada rekasa, bisa menang nanging sesok Kurawa meng karek nampa ampase, patine
digawa tenggiri, guwita.”
119.
P.Duryudana :
“Nanging waton pandhawa tumpes tapis tanpa sisa, ludes keles tanpa kilap. Kula
lega ing raose manah, hanggih najan kula boten ngukup menapa-menapa waton
pandhawa sirna.”
120.
Sengkuni : “Kula
sumanggaken.”
121.
P.Duryudana : “Yen
mengkono yayi prabu tak sembadani kang dadi kersane yayi prabu. Apa pamundhutmu
bakal tak lilakke.”
122.
P.Suryabupala :
“Matursewu sembah nuwun koko Prabu Duryudana semanten dening kapitadosan
dhumateng gagah kula. Nyuwunsewu kula sowan dhateng sewutara sakmenika sampun
nganthi prejurit tanpa wicalan sikep siaganing ngayuda, kula kendelaken wonten
ing telenging wana, ingkang sampun nylaketi gumelaring paprangan tegal kuru.
Mila sampun ngantos panganti-anti prajurit pandherek kula, kula nyuwun pamit,
nyuwun pangestu sedya bidhal wonten madyaning paperangan, kula aturi nemtoaken
kula wangsul sampun saged mbekta wasul kuwandhaning para Pandhawa.”
123.
P.Duryudana :
“Ingkang prayitna yayi prabu.”
124.
P.Suryabupala : “Kawula
luhung-luhung, pinanggih.”
Gendhing....
125.
P.Duryudana : “Paman
Sengkuni!”
126.
Sengkuni : “Kulanuwun
wonten dhawuh?”
127.
P.Duryudana : “Prabu
Suryabupala kula nemtoaken saged unggul jayanipun!”
128.
Sengkuni : “Inggih,
nanging anggenipun cuwo manah kula yen kelampah Suryabupala sasat. Peran dalem
sampun boten kagungan menapa-menapa, awit Nagari Ngastina patinipun dipun bekta
piyambakipun wonten duryugupita, Ngastina kang ampas.”
129.
P.Duryudana : “Boten
menapa-menapa.”
130.
Sengkuni : “Kepareng
ngunjuk atur, sewu lepat nyuwun pangaksama.”
131.
P.Duryudana :
“Iggih.”
132.
Sengkuni : “Badhe
ngunjuk wau-wau wigeri ringo-ringo raose manah kula, kuwantos mbok menawi
dadosaken dukaning penggalih!”
133.
P.Duryudana : “Badhe
matur menapa?”
134.
Sengkuni : “Upaminipun
Suryabupala menika saged sasat nanging sampun ngatos sedaya dipun bekta dhateng
girigupita. Kula wedhal Negara Ngastina, kula kepareng nglajengaken, Senopati
pengapit!”
135.
P.Duryudana :
“Sinten?”
136.
Sengkuni : “Nuwunsewu,
anak kula keng rayi Raden Antisura Surabasah tuwin adhi kula Jayawiluka.”
137.
P.Duryudana :
“Inggih.”
138.
Sengkuni : “Wonten
bebasan mbabati ngarungkut ngobori ngapeteng, ngrumiyini lumampah, ngrumiyini
Suryabupala. Syukur Pandhawa saged pejah saking keng rayi Antisura-Surabasah
keng rayi boten badhe nyuwun ganjaran, awit namung niat kepingin ngetingalaken bekti wonten ngarsa dhateng
manah prabu.”
139.
P.Duryudana :
“Menapa sagedipun pitados kekiyatannipun, Kurawa sampun boten sapintena
kekiyatanipun.”
140.
Sengkuni : “Nuwunsewu,
salebetipun Perang Baratayudha dados prajurit saking Plasajenar menika dereng
wonten ingkang dereng medal ing paperangan. Menika mangkeh saged dados
kanthinipun keng rayi Antisura-Surabasah pangiten-inten kula prajurite Pandhawa
sampun boten saged nataki katahipun prajurit saking Plasajenar, lan sakderengipun
Baratayuda lumampah sampun kula gladi, anggenipun sami damel gelaring aperang
kados sampun boten badhe nguciwani.”
141.
P.Duryudana : “Yen
mekaten borong pamanari.”
142.
Sengkuni : “Kepareng
nglajeng ingkang bapa nyuwun tambahing pangestu!”
143.
P.Duryudana : “Paman
sampun pegat kaprayitnan, Kartomarma.”
144.
Kartomarma : “Kawula luk
nun.”
145.
P.Duryudana :
“Ngati-ati aja keri, duga-duga digawa dherekna paman Sengkuni?”
146.
Sengkuni : “Kawula
luknun inggih dhateng nyuwun tambahing
pangestu.”
147.
P.Duryudana :
“Kartomarma ingkang prayitna Kartomarma.”
Gendhing......
Kaglar Sang hya para madya, kang sang hya maraseba mabra busana
nira, bina panjrah ingkang puspita, minangka tindhihing pra prawira tuhu.
Hambeksudira rumaksa sang hyang wadya bala sumebya hangayai karya pakaryaning
praja. Haa...
(ing pasewaan ngastina)
148.
Prabu Suryabupala :
“Kangmas Srigatalpati ingkang rayi Jayawiluka nyadhong dawuh?”
149.
Kartomarma :
“Rama, rama kepatyaning peputra Antisura nyadhong dhawuh ingkang putra
Surabasah nyadhong dhawuh. Wehehehehe.. Man, ingkang putra kerta denda nyadhong
dhawuh.”
150.
Sengkuni :
“Kartamarma?”
151.
Kartomarma : “Kula
paman.”
152.
Sengkuni : “Dulurmu ki
karek pira ta?”
153.
Kartomarma : “Kantun
gangsal jakepipun koko Prabu Duryudana?”
154.
Sengkuni : “Karek sapa?”
155.
Kartomarma : “Ingkang putra
Kartomarma, Kartodenda, Citraksa, Citraksi.”
156.
Sengkuni : “Andhekna
kok ramene ora jamak. Sing jenege Kurawa angger ngumpul leh kating brengek
supaya lerem sakwetawa.”
157.
Kartomarma : “Kula
sumanggaaken.”
158.
Sengkuni : “Kartodenda?”
159.
Kartodenda : “Ehhehe...
kula man.”
160.
Sengkuni : “Serekna
ndisik sirka sak kadangmu. Mengko nek kowe saur manuk, nggonku paring dhawuh
ora bisa cetha engko menapa tuntang suh.”
161.
Kartodenda : “Inggih
inggih inggih sendika.”
162.
Sengkuni :
“Jayawiluka!”
163.
Jayawiluka : “He kula
luknun.”
164.
Sengkuni : “Antisura,
Surabasah.”
165.
Antisura : “Kula
rama.”
166.
Surabasah : “Kula rama.”
167.
Sengkuni : “Nek kowe
arep mukti yo iki mengko dalane, nek kowe arep mati yo iki mengko dalane!”
168.
Surabasah : “Kangmas kok
ngendika mekaten dospundi?”
169.
Sengkuni : “Tak jarwani
Baratayudha wis wolulas dina iki Kurawa wis akeh sing dadi bebanten wis ora ana
ingkang bisa dipercaya ndepani paperangan tegal kuru. Iki mau ana tamu saka
mancanegara, sedulure tuwa Suryanggana, jenenge Suryabupala saguh arep ndepani
peperangan tegal kuru, nanging umpama iku isa menang Ngastina wes ora kumanan
apa-apa. Aja nganti kamulyan Ngastina iki tumiba wong mancanegara. Aku ngunjuk
ana ngarsa dalem Antisura-Surabasah, Jayawiluka supaya jumeneng Senopati
pengapit. Marga Senopati maha Senopati wis diasta koko Prabu Wandaraka. Mangka
aku karo koko Prabu Wandaraka ora percaya. Heehh aku mastike patine Werkudara
apa Janaka kudu saka tanganmu. Piye Jayawiluka, kok bareng krungu tembung
jenenge Janaka kowe kok ya malah menteleng ora kedhep-kedhep, wedi?”
170.
Jayawiluka : “Wah yen
ajrih....”
171.
Surabasah : “Kula
boten.”
172.
Jayawiluka : “Lajeng
panjenengan ngendika kedah kula saged mejahi Janaka sing ajeng kula ngge
kekuatan apa? Janaka nate dadi jagone dewa, kula niku mang dijagokne, bola-bali
ora tau dadi niku piye.”
173.
Sengkuni : “Kowe kuwi
aja kok wedi karo kadang, kudu dibukteke Janaka kuwi ampuh biyen. ning saiki
lak ora, merga Janaka kelangan Antawijaya kuwi gela atine, Werkudara kelangan
Gatotkaca kuwi gela atine.”
174.
Jayawiluka : “Inggih.”
175.
Sengkuni : “Mula nek
kowe manut aku, aku sing nata.”
176.
Jayawiluka : “Inggih
ndherek.”
177.
Sengkuni : “Ndherekna.
Sakpatine Antawijaya, Gatutkaca, Janaka kuwi senengane saba alas ndewe, pisah
karo barisan gedhe. Arep omong digdaya kaya ngapa nek angles pikire, cara
tembung saiki stres, yo apa-apa lali tak kandani. Arep muni tha kleru la, arep
muni la kleru sa. Ngecakna mantrap-mantrap wis tumpang suh bahasane. Ora mandi,
kowe ingkang tak percaya nggoleki Janaka.”
178.
Jayawiluka : “Inggih
sendika.”
179.
Sengkuni :
“Antisura-Surabasah nglulu-ngluluki pakuwone si Werkudara, Werkudara mati seko
tanganmu, bakal gedhe lokmu. Aku ya wis ngonjuk ora nyuwun ganjaran, nanging
mengko aku isa dadi adu manising rembuk. Kowe Antisura-Surabasah bakal mukti
wibawa ing Negara Ngastina. Priye saguh?”
180.
Jayawiluka : “Sagah,
inggih menika sagah.”
181.
Sengkuni : “Bagus.”
182.
Sengkuni :
“Kartomarma!”
183.
Kartomarma : “Kawula luk
nun.”
184.
Sengkuni : “Metua ana
njaba, tatanen para prajurit.”
185.
Kartomarma : “Inggih
sendika.”
Sigra medhal undang wadya, dyan Kartomarmo griya medhal ing
jawi. Swara tenara mangungkung ngumandhang ngawang-awang. Bendadari tanggur
slompret klawan bungsur tontong grit ngunyo sauran. lirumbak ing jala niki,
(mung-mung jelererer)2x dandanana sira mangun-mangun makutha majru jungkung
widangnya suradi mantra oong ong he he.....
186.
Kartomarma : “Kepareng matur
kersanipun Paman Harya Sengkuni. Para wadya kadawula sak wanci-wanci sampun
boten badhe nguciwani awit sampun sami
sawida ing gati, samekta ing diri.”
187.
Sengkuni : “Yaya syukur
ngger, Jayawiluka.”
188.
Jayawiluka : “Kawula luk
non.”
189.
Sengkuni :
“Antisura-Surabasah enggal budhal prikalenggahan punika.”
190.
Antisura-Surabasah :
“Inggih sendika sendika.”
191.
Sengkuni : “Bidhale
prajurit saking telenging pakuwah sewu
kono yayah sima nebak!”
Sindhen...
Siriget lumampahing prajurit saking Plasajenar, ingkang tumuju
paperangan tegal kuru. Kang kinarya sambeting carita inggih pakuwun Prabu
Kumbala, ingkang minangka gegununganing para satriya, ingkang mapan wonten
pakuwon randukumbala. Panenggak Pandhawa ingkang angrenggani kasatriyan
Jodhipati. Do inguni kekasih Raden Werkudara, ya Raden Bratasena, ya Raden
Wijasena, ya Raden Jayadilaga, Raden Kusumadilaga, ya Haryo Bima lah punika
warnanipun Raden Haryo Werkudara satriya gagah wideksa ageng ngaluhur,
pakulitan jenar, hendra kencana sinangling. Imba muler geni, rawis tumpang sanga,
gudheg wok simbal jaja. Njeggureng nanging ora medeni malah marak ati, yen
ngendika bleger-bleger kaya gludhuk. Sumara tejane kaya sumarate lintang bima
sekti nuwak tutuking naga. Ingkang sowan ing ngarsa tumungkul konjung pratiwi
miswanipun satriya harba ruci. Kekasih Haryo Raden Setyaki yo singa mulandara,
wersine wira, bima gunting yo Raden Padmonegara. Sumambung pungkur pisowanipun
Retiyowati. Werkudara jajar pisowanipun patih Andokowana. Maksih kasambet
pisuwanipun Patih Nirbita, ning kaya banyu ning kaya watu dereng kepareng
wijiling pangandika wonten kapal ninggalih harsa rukmendaya pangudi asmaraning
nendra kang dereng kawijil. oooooooooo....oooooo....ooo
engengeng...hong..hong.”
Sindhen....
Jrutya sulung ngulat sekar gambangkara hangrerujit nglala ing
ngalitan bangkit lali lingalitan bangkit lali ngula lulus lila he... lamun
pinedi.
192.
Wekudara :
“Heh...kunthi!”
193.
Kunthi :
“Kulanuwun, wonten dawuh kakangmas Werkudara.”
194.
Werkudara : “Udrawa kakangku?”
195.
Udrawa : “Kulanuwun,
wonten dawuh yayi?”
196.
Werkudara : “Apa dene Andokawana lan Nirbita bapaku, bebasan adoh
kakawin cedhak tak ngeraketake, aku arep takon karo Udrawa kakangku.”
197.
Kunthi :
“Inggih.”
198.
Werkudara : “Patine Karna
kakangku, Dursasana kakangku, bebasan wes jebol betenge Negara Ngastina. Apa
sababe Kresna jliteng kakangku? Paring dawuh, isih bakal ana Senopati ingkang
ora kena dianggep entheng bobote Ngayuda, iku banjur sapa gegeduke Duryudana
kakangku, tak umpamakke garuda wes sempal suwiwine kiwo tengen, wes sempal
sikile kiwo tengen. Apa isih ana gegeduk ingkang bebayan?”
199.
Udrawa : “Kepareng
ngunjuk atur yayi sewu lepat nyuwun pangaksama.”
200.
Werkudara : “Yo.”
201.
Udrawa : “Sinuwun
Dwarawati kang raka menika jejer pengayomaning Pandhawa, jejer pengajenging
para Pandhawa ingkang menang mranata lumampahing Perang Baratayuda tumrap
Pandhawa.”
202.
Werkudara : “Yo.”
203.
Udrawa : “Dados
pangajeng menika boten gampil tumindak sepecak ngendika saktrimah kedah saged
tinuladha saged sinudar sana, dados pangendikanipun ingkang sinuwur Dwarawati
mesthi boten nggampilaken garapan ingkang dereng datheng. Boten nganggep
entheng bobotipun perkawis ingkang badhe datheng menika sampun jamakipun
pangajeng nika ngaten. Kadaan menika namung kagengeng sumbar kagengeng suwanten
kakathahan janji menika malah sok nulayani.”
204.
Werkudara : “Mengkono?”
205.
Udrawa : “Inggih,
dados mekaten wau keparengipun ingkang sinuwun Dwarawati panjenegan sak kadhang
menika sampun ngantos sirna dhateng raos kaprayitnaning lair purun gatos, awit
menika wonten madyaning bebaya menawi lena kaprayitnanipun sakedeping netra
bebasan menika badhe saged damel risak pranatanipun dumadose Perang
Baratayudha.”
Hande bima kena suyaka, sudibya sawara-wara unggul gadanira
pitung gedhe.hong...hong..hong. Macenging rana ngulat kuru, kula hasta kecer
kedheng nyaur punagi nebak jaja ndudut usus nglangga ludira. Netepana pramila
ila ha....
Ecadene embal pangandika tanpantara pelajaripun wadya ingkang
mercambeng ing kaca daleng-daleng....
206.
Werkudara : “Hah...sapa
kowe?”
207.
Patih surata : “Nyuwun sewu
nyadhong duka gusti Raden Harya Werkudara, ingkang abdi menika patih Surata,
Patih Madukara.”
208.
Werkudara : “Pada kanthi
raharja?”
209.
Patih surata : ”Inggih
pangestu dalem sungkeming pangabekti konjuk?”
210.
Werkudara : “Ya tak tampa,
ana wigati apa?”
211.
Patih surata : ”Paring
ngonjuk atur, palenggahan menika kula piniji macak baris, wonten sajawining
pakuwon randukumbala, ngaturaken duta pengrawuh?”
212.
Werkudara : “Duta
kongkonan pengrawuh patih Rejopati?”
213.
Patih surata : “Dereng
wonten raja pati, nanging wonten kedadosan ingkang bebayan. Barisan saking
pakuwon sewutana tanpa wicalan dipun pandegani Senopati, kekalih kula dereng
saged nyidekaken tuwin nyataaken menika sinten, nanging ingkang baku menika
Senopati saking pakuwon sewuntana ngirit wadyabala segelar sebaris papan, gaman
nggabak kadi jati arang, payung amruk kados jamur kering sumbarang woh-woh
ingkang dipun woh-woh amuk. Nuwun sewu gusti kula para kadang Pandawa? Ingkang
menika kula sumanggaaken abdi dalem cuwadung dawuh.”
Leng leng ngendriya mangun-mangun mangungkun hong... hong...
hong... hong...
(ing tengah dalan nalika ketemu prajurit plasa jenar)
214.
Werkudara : “Budawa
kakangku prayogane laku?”
215.
Budawa : “Yayi
Werkudara wis padakken pewala saking ketebihan rumiyin, boten mrayogi bilih
Raden Werkudara nyelirani mbuktiaken wadyabala cekap para kadang menika ingkang
badhe buktikaken langkung rumiyin.”
216.
Setyaki :
“Keparenga keng rayi Setyaki kangmas sing badhe mbuktikake nyuwun pangestu?”
217.
Werkudara : “Kebak mangkat
sendika.”
Sindhen.....
218.
Prajurit 2 : “Mandheg
sek mandheg, maju mandheg maju mandheg mandheg.”
219.
Prajurit 1 : “Kosek
sabar ta, sabar. Wong semene akehe mlaku, sing ngarep mandhek sing buri
ngangsek mangka kabeh gawa gaman tumbak ligan, nek nganti tumbake nyoncot
kancane dewe harak mati sing tanpa
lelabuhan.”
220.
Prajurit2 : “Ora
ngono. Sing dadekke pengarep ki sapa ta? le mlaku prajurite kok koyo ngene.”
221.
Prajurit 1 : “Iki sing
didadekke pengarep ki slamet nggudik.”
222.
Prajurit 2 : “oooo lha
wong slamet nggudik dadeke pangarep, anggere slamet ki mung kakean itung.”
223.
Prajurit 1 : “O kosek
to aku sing nong ngarep ki ya wis ora koyo-oyo oleh ku arep ngubetke kanca
ngono lho, lha nek sing diubetke yo ora ono kuwi?”
224.
Prajurit 2 : “Ora,
saiki tak takon sing marake leh mlaku prajurit mandek ki apa ngono lho?”
225.
Prajurit 1 : “Lha rak
ngono takon sek, ora kok njur muring-muring sing nong ngarep, pancen wong
ngluputke ki sing gampang dewe, ngluputke ora percaya gampang dewe kuwi.”
226.
Prajurit 2 : “Kowe do menenga sek tak takon. Satriya
sing ngaglah ana tengah ndalan sapa?”
227.
Setyaki :
“Kowe takon marang aku?”
228.
Prajurit 2 : “Iya”
229.
Setyaki :
“Aku tak takon ndisik, kowe prajurit endi?”
230.
Prajurit 2 : “Piye jok,
tak takoni durung ngaku malah aku aku karo kowe ditakoni prajurit endi?”
231.
Prajurit 1 : “Ngaku opo
anane, iki prajurit saka Plasajenar. Prajurite gustiku Raden Antisura Surabasah.
Kowe sapa?”
232.
Setyaki :
“Yen kowe takon marang aku, aku satriya garba ruci Setyaki.”
233.
Prajurit 1 : “Sapa?”
234.
Setyaki :
“Setyaki.”
235.
Prajurit 1 : “Duh co,
setyaki?”
236.
Prajurit 2 : “Sapa?”
237.
Prajurit 1 : “Setyaki.”
238.
Prajurit 2 : “Kowe meh
muni Setyaki kok wedi?”
239.
Prajurit 1 : “Kowe ora
ngerti ta kondhane Setyaki. Satriya digdaya pada.”
240.
Prajurit 2 : “Kowe rak
mung lagek kabar no, kowe weruh rak lagi saiki ta?”
241.
prajurit 1 : “Iya.”
242.
Prajurit 2 : “Nah, wong
ki aja angger krungu kabar sing perlu dibuktekke mung anggek krungu jenenge kok
wedi, takoni karepe piye Setyaki ngendeki wong samene akehe.”
243.
Prajurit 1 : “Karepmu
piye Setyaki ngedekne wong samene akehe?”
244.
Setiyaki : “Cetho kowe prajurite anake Sengkuni?”
245.
Prajurit 1 : “Iya-iya.”
246.
Setyaki :
“Nek keno tak eman, kowe mundur Senopati anake Sengkuni kon maju tak
tandangane.”
247.
Prajurit 2 : “Co!”
248.
Prajurit 1 : “Nggih.”
249.
Prajurit 2 : “Jebul
Setyaki ki pikire apik.”
250.
Prajurit 1 : “Kok
pikire apik?”
251.
Prajurit 2 : “Lha wong
aku dieman ki, dieman kon mundur. Perkara iki aja melu-melu.”
252.
Prajurit 2 : “Eh met,
kowe le dadi prajurit wes suwe durung?”
253.
Slamet : “Ha?”
254.
Prajurit 2 : “Kowe le dadi
prajurit wes suwi durung?”
255.
Slamet :
“Iya uwis, wong wis nduwe anak loro kok.”
256.
Prajurit 2 : “Wah
mateni pasaran nek ngono. Lha gene kowe suwe leh dadi prajurit. Lha kok duwe
manungsa kaya ngono, tetembungane kok ngalem mungsuh.”
257.
Prajurit 1 : “Ora
gelem.”
258.
Prajurit 2 : “Ora
gelem?”
259.
Prajurit 1 : “Ora
gelem. Aku ora gelem lek mundhur, malah kowe sumingkira Setyaki, nek ora
sumingkir tak ranjak.”
260.
Setiyaki : “Nek
pancen kowe ora gelem tak eman, ojo maju baka siji bareng loro, ayo ngono
Setyaki.”
261.
Prajurit 2 : “Co,
disumbari pecak aji maju, maju gaman likan maju paring gaman likan
diranjang-diranjang ranjang ranjang ranjang.”
Gendhing....
Adegan pada geger antarane Setyaki lan prajurite Plasajenar.
262.
Prajurit 1 : “Ayo kanca
padha mundur, mundur.”
263.
Sengkuni : “Aduh
sikilku kejeklok, seminggu hurung mari. Aduh anggo mlaku kok loro nggo njejak
lara ora ya? haduh tanganku sempal, haduh kupingku ilang, haduh mripatku lara,
nyemplung kena panahku dhewe, inuh inuh inuh....”
264.
Prajurit 1 : “Aduh
aduh....!”
265.
Prajurit 2 : “Ki ngapa
ya?”
266.
Prajurit 1 : “Ndasku
ilang.”
267.
Prajurit 2 : “Ndase
ilang kok iso ngomong?”
268.
Prajurit 1 : “Sing
diomong ran cangkem.”
269.
Prajurit 2 : “Lha
cangkem iki ran ya dadi perangane sirah?”
270.
Prajurit 1 : “Yo kosek,
sing mlaku dudu ndasku sing ilang ki ndas mbedudak.”
271.
Prajurit 2 : “Ora
memper, kancane kelangan sikil, tangan le sambat ki ya lumrah, kelangan ndas
mbedudak kok mbengek-bengek.”
272.
Prajurit 1 : “Wa lah
coto ek.”
273.
Sengkuni : “Yo, yo.”
274.
Prajurit 1 : “Iki lho apa lho iki?”
275.
Sengkuni : “Untuku
kumat.”
276.
Prajurit 1 : “Lha mbok nek lara untu ki ora enyang.”
277.
Sengkuni : “Ora enyang
ya ora entuk-entuk.”
278.
Prajurit 1 : “O, dadi
kowe olehe enyang mikir entuk ngono ta? Mempera nek prajurit kaya ngono.”
279.
Sengkuni : “Ora ngono,
lha kowe dadi prajurit semomo akehe le mundhur ora ditata sambat ngaruwara,
kena ngapa kowe?”
280.
Prajurit 2 : “Lho sampeyan niku sinten?”
281.
Sengkuni : “Lho dhurung
tepung ta karo aku? Patih Haryo Sengkuni.”
282.
Prajurit 2 : “O, kowi ta Sengkuni.”
283.
Prajurit 1 : “Ho’o.”
284.
Prajurit 2 : “Dene ki
wis tuwek.”
285.
Prajurit 1 : “O, tuwek
kok iseh ampuh kuwi.”
286.
Sengkuni : “E lha
hurung ngerti to nek aku ki sesembahanmu.”
287.
Prajurit 1 : “Nyuwun ngaputen dereng nate pinanggih kok
gusti.”
288.
Sengkuni : “Kena apa
iki mau?”
289.
Prajurit 1 : “Pinanggih satriya naminipun Raden Setyaki. Ngamuk dipun lepasi jemparing
katah sanget boten tumawa. Malah lajeng prajuritku ngawut-awut kados ngoten.
Haduhh....”
290.
Sengkuni : “Wis mundur.
Sing lara ditambani kana! Sing tekani pati diruti sing becik-becik, wis
sendika-sendika.”
291.
Prajurit :
“Ngeng ngung ngeng, ngeng ngung ngeng.”
292.
Sengkuni : “Lho-lho Nek
prajurit kalah kuwi unen-unene kuwi ora usah diuneke.”
293.
Prajurit :
“Lha niki boten jarak niku, tangan kula niku loro sing siji sempal, bendine
kaleh tangane kula ana bendi kalih tabuh kula cangking tangan siji, lha kula
ngge lembeyan niku rak tabuhe nuthuk
dewe ta, lha sing ketuthuk lak sanes nggen pencu. Kula munine mboten isa muni
mung meng, meng mung meng meng mung meng.”
294.
Sengkuni : “Memper ae
ora.”
E... leng-leng ngendriya mangun-mangun mangungkun hong... he...
295.
Sengkuni : “
Sura Basah?”
296.
AntiSura Basah : “Inggih
wonten dawuh.”
297.
Sengkuni :
“Prajurit Plasa Jenar bubar mangut. Candrane kaya tambak merang keterjang
banjir bandhang, kowe kudu bisa gawe pepulih.”
298.
Anti Sura Basah : “Nyuwun
pangestu kanjeng rama, kula ing paringna di kadigdayanipun satriya ingkang sabiyantu para padhu.”
Sindhen...
Sigra tan bala tumingal jambuh prangsangnya ngedali. Lir tatit
wilidhen gadha dayohan gung mangun tangiti. Mbenjang sangaji wijil lathinya
ngedhali wungus, trusa surawilaga kaya butasena wridil pasthi jangga dendanya
mangambak baya. Ho....
299.
Anti Sura Basah : “Jagad
dewa bado, para manungsa wani ngablah ana madyani paperangan, dak waspadakake
wus kadok yuk suwa. He kowe aja mati gowo jeneng! Ngakuwo sopo jenengmu?”
300.
Patih Nirdita :
“Jagad dewa Badowo, kawistara yen satriya ing tanpa ngerti tata nagara apa mene
yuda negara, wis rumangsa kok kepatang kelayan wong tua, ilang tata kramamu.”
301.
Anti Sura Basah : “Ning
kene dudu papane wong ngajeni wong, paprangan papane wong golek sulaya, golek
musuh drohon. Meng kari kowe ngaku opo ora? Aku butuh ngerti jenengmu, aja nganti
kowe mati tanpa aran druhun.”
302.
Patih Nirdita :
“Yen mengko aku genti takon, kowe sopo jenengmu?”
303.
Anti Sura Basah : “Takon
e durung ngaku ganti takon?”
304.
Patih Nirdita :
“ Apa bang.”
305.
Anti Suro Basah : “Putra
plasa jenar, putrane Kanjeng Rama Patih Harya Sengkuni, Raden Sura Basah.”
306.
Patih Nirdita :
“Layak ora ngerti tata krama, anake Sengkuni. Anake wong sing gawene adu-adu,
ngliciki carangan ketul, gawene mung seneng marang pasulayan.”
307.
Anti Sura Basah : “Ora
sah kakean cangkem jenengmu sapa?”
308.
Patih Nirdita :
“Ronggo dalem, Wiratha Patih Nirdita.”
309.
Anti Sura Basah : “Weh...
Patih Nirdita?”
310.
Patih Nirdita :
“Nggih.”
311.
Anti Sura Basah : “Wis
pikun, ngadek ora jejeg nek kena tak ilingke, Baratayuda iki dudu perkarane
wong Wiratha, naning perkarane Pandhawa karo Kurawa. Kowe dudu waris Pandhawa,
ning nek iki dudu Kurawa nanging sedulure nak sanak koko Prabu Duryudana, dadi
ijeh ana gandheng cenenge sedulure Kurawa, balik kowe wong liyan bebrayan. Nek
Baratayudha, Pandhawa menang kowe arep diganjar apa? Nek kowe kalah mati tanpa
lelabuhan, mumpung durung babat bucik uripmu, mundura.”
312.
Patih Nirdita :
“Sawijining satriya ingkang ora mangerti marang lungguhing bener lan luput.
Baratayuda iki perane suci, Baratayudha iki perkarane Kurawa lan Pandhawa.
Nanging ingkang bener iku pandhawa, Kurawa ingkang luput. Nek aku ngelabuhi
pandhawa, nek aku menang kontab ing jagad, nek aku kalah tekane pati dadi marga
wenganing wiwara suwarga mulya.”
313.
Anti Sura Basah : “Wah
kedhuwuren omonganmu. Arepa kowe iku wong sugih japa mantra wis pikun, mbedhel
uripmu, getas balungmu, kenthel getehmu lali carane mantramu. Tak teblak
dadamu, ora rontok igamu tak seblak prigelan.”
314.
Patih Nirdita :
“Majua.”
Sindhen...
0 komentar:
Posting Komentar