Tuladha Pawarta

Klenengan Selasa Legen

Nyebar Pitutur Luhur Liwat Tabuhan Gendhing

Tabuhan gendhingKebo Giro pelog barang kang kasusul Ladrang Wilujeng pelog barang ing wayah wengi kuwi miwiti adicara Klenengan Selasa Legen kang dibabar ing Balai Soedjatmoko Solo, Senen (1/2). Klenengan Selasa Legen ing kalodhangan iku murwakani taun 2010, sawuse ing sasi Januari wingi ora ana dina Selasa Legi. Kanggo wiwitan Klenengan Selasa Legen iki, Balai Soedjatmoko ngepyakake pepanthan karawitan putri Srikandi Laras kang disengkuyung saka Sanggar Seni Sekar Jagad saka Kotakan RT 04/RW VI, Desa Bakalan, Kecamatan Polokarto, Kabupaten Sukoharjo. Anggotane yakuwi sing nyebar ing Sukoharjo kang duweni pamikiran padha, yakuwi kepengin nguri-uri kabudayan Jawa.

Srikandi Laras kang Dipandhegani dening Painemi AMPd, wengi kugadeggwi kaya-kaya bisnambani rasa ngelake para warga kang wus suwe ngenteni larase swara gending ing papan kono. Pepanthan karawitan putri iku gadeg awit taun 2008 kapungkur, kanthi anggota sing sakabehe wong wadon. Mula iku, anane Srikandi Laras iki bisa nyuguhake babaran kang beda tinimbang pepanthan karawitan liya sing akeh-akehe didominasi wong lanang.

Garapane para wanita iku pantes ditungi jempol dening para pamirsa utawa warga bebrayan sing ngebaki Balai Soedjat moko. Garapane pancen apik, alus, tur laras. Kurang luwih 11 gendhing sing ditabuh kuwi kabehe garapane apik. Apa maneh, gendhing riptane Srikandi Laras dhewe, yakuwi lancaran Sega Thiwul lan lancaran utawa lelagon Dewi Sri. Rong gendhing kuwi ora awates gendhing kaya salumrahe gendhing, nanging duweni makna lan ngamot pitutur luhur marang warga bebrayan minangka dadi bahan pamikiran kang bisa dianggo sangu ngadhepi kahanan ing jaman saiki. Bisa uga, rong lagu kuwi dadi sarana ngajak sakabehe wong supaya bali nguripi potensi lokal sing bisa nglawan arus global.

Kaya ing lancaran Sega Thiwul, liwat gendhing iki, coba didungungake manawa awake dhewe iki lagi diadhepake marang kahanan donya sing sarwa kapitalis, uga tragedi pertanian sing wus kebak apa-apa sing mambu bahan kimia.

Kelangan tradhisi

          “Awake dhewe nyoba ngajak bali maneh ing potensi lokal. Kabeh warga nresnani dhaharan sega thiwul, dudu hamburger utawa steak. Sega thiwul iki sanajan sepele, nanging ya ngandhut gizi akeh. Liwat Sega Thiwul iki, aku sakanca uga pengin ngajak kabeh pehak supaya luwih ngajeni para tani. Wong dhuwuran dhewe tanpa para tani mesthi ya ora bisa mlaku,” pratelane Joko Ngadimin, pangarsa Sanggar Seni Sekar Jagad, nalika ditemoni ing saselane acara.

          Dene lancaran Dewi Sri, jarene Ngadimin, nggambarake kahanan ing jaman saiki, yaiku warga bebrayan wus kelangan tradhisi caos dhahar dhumateng Mbok Sri utawa Dewi Sri, sing diprecaya saperangane wong minangka dewine pari.

          “Ndhisik para tani isih ngadani tradhisi methik wiwit. Kabeh ngugemi manawa nyingkiri utawa ninggalake tradhisi kuwi mesthi parine bakal diserang ama. Liwat gendhing iki, coba dielingake maneh lan ngajak bali ing tradhisi luhur mau. Apa maneh, ing Sukoharjo saiki lagi entuk serangan ama tikus gedhen-gedhenan. Iki wanci sing pas kanggo ngajak nguripake tradhisi caos dhahar dhumateng Dewi Sri,” tandhese Ngadimin.

Kapetik saka: Jagad Jawa Solopos